infolinks

Ipinapakita ang mga post na may etiketa na Felix Y. Manalo. Ipakita ang lahat ng mga post
Ipinapakita ang mga post na may etiketa na Felix Y. Manalo. Ipakita ang lahat ng mga post

Miyerkules, Setyembre 30, 2015

MALILIGTAS BA ANG MGA NATIWALAG SA IGLESIA NI CRISTO? ANO NAMAN ANG MANGYAYARI SA MGA KUSANG LUMABAS O ITINIWALAG ANG SARILI?

(c) Bro. Jose Ventilacion
Kamakailan ay may mga natiwalag sa Iglesia na ang paniniwala ay maliligtas din sila sa kaparusahan pagdating ng Araw ng Paghuhukom. Ang akala naman ng iba ay maliligtas din sila dahil sa hindi naman daw sila itiniwalag kungdi kusa silang tumiwalag. Gayunman, ang mga itiniwalag at kusang tumiwalag ay pareho ang kalagayan: nasa labas sila ng tunay na Iglesia. May kaligtasan ba sa mga nasa labas? Ano naman ang sinasabi ng Biblia sa mga nasa labas ng Iglesia?
Ayon sa 1 Corinto 5:13, ibinilin ng Diyos sa Pamamahala ng Iglesia na “alisin nga ninyo sa inyo ang masamang tao” (DS). Ang katumbas ng “alisin” ay “itiwalag” ayon sa saling MB.
Ikinakatuwiran ng mga itiniwalag na hindi raw sila kabilang sa “masasamang tao” dahil para daw sa ikabubuti ng Iglesia ang kanilang layunin at ipinakikipaglaban o itinataguyod. Subalit alam naman natin na kahit ano pa ang kanilang ikinakatuwiran – na hindi sila masama – kaya sila itiniwalag ay mayroon silang ginawang masama. Ititiwalag ba sila sa Iglesia kung tama ang kanilang ginawa? Mali ba ang ginawa ng Pamamahala na sila ay alisin sa kalipunan ng mga matuwid? Tama ba ang kanilang ginawa?
Ang paghihimagsik ba laban sa Pamamahala ay mabuti o masama? Mabuti ba ang paghahasik ng pagkakabaha-bahagi? Mabuti bang gawa ang paninirang-puri sa mga ministro at mga manggagawa? Mabuting gawa ba ang paghikayat sa mga kapatid na huwag na silang sumamba o kaya ay huwag nang mag-abuloy? Mabuti bang gawa ang sabihin sa mga kapatid na huwag na silang tumulong sa pagpapalaganap ng salita ng Diyos
Ang mga nahulog sa mga kasalanang binanggit ko sa itaas ang dahilan kaya sila ay natiwalag sa Iglesia. Kaya, bagamat naghuhugas sila ng kamay at nangangatuwiran na “mabuti” daw ang kanilang ginawa, ang mga natiwalag ayon sa Biblia ay hindi mga mabubuting tao kungdi mga “masamang kasamahan” (1 Corinto 5:13 NPV).
Ayon din sa talatang ito, ang mga nasa labas ay may hatol. Ano ang hatol sa mga nasa labas ayon kay Cristo? Ang mga hindi nanatili ay masusunog sa apoy (Juan 15:6). Kailan? Sa Araw ng Paghuhukom ayon sa 2 Pedro 3:7, 10.
Ang ikinakatuwiran naman ng iba ay: “tao lang ang nagtiwalag sa amin, hindi ang Diyos, kaya maliligtas pa rin kami.” Dahil ba sa ang Pamamahala na nagtiwalag sa kanila ay tao, nangangahulugan nang hindi sila itiniwalag ng Diyos? Paano ba nagtitiwalag ang Diyos ng mga masasama? Siya ba mismo ang mananaog sa lupa para sabihin ng personal sa mga masasama na sila ay itinitiwalag?
Sa panahon ng unang Iglesia, sino ba ang nag-utos na ang bilin niya ay “itiwalag ninyo ang masamang kasamahan ninyo”? Diyos ba ang nagsalita sa talatang ito o tao lang? Ang sumulat ng talatang ito ay si Apostol Pablo. Siya ay tao. Subalit siya ba ang nag-utos ng isinulat niya?
Ang sabi pa niya ay “Ganito ang sabi ng Kasulatan.” Samakatuwid, ang utos na ito ay may pinanggalingang kasulatan. Aling kasulatan ang sinipi ni Apostol Pablo? Ang utos ng Diyos sa pamamagitan ni Moises na nakasulat sa Deuteronomio 17:7 (NPV), na ganito ang sinasabi:
“DAPAT ALISIN SA KALIPUNAN NINYO ANG MGA TAONG MASASAMA.”
Kaya, ang isinulat ni Apostol Pablo na “ALISIN NGA NINYO SA INYO ANG MASAMANG TAO.” (1 Corinto 5:13 DS) o "ITIWALAG NINYO ANG MASAMANG KASAMAHAN NINYO" (1 Corinto 5:13 MB) ay utos ng Diyos na nakasulat sa Biblia sa panahon pa lamang ni Moises.
Sino ang kinasangkapan ng Diyos noong una para matupad ang utos Niya na ALISIN o ITIWALAG ang mga masasamang tao sa bayan Niya? Ganito ang sinasabi ng Kasulatan sa Bilang 16:23-27 NPV:
23 Sinabi ng PANGINOON kay MOISES. 24 “Sabihin mo sa kapulungang lumayo kina Core, Datan at Abiram.” 25 Pinuntahan ni Moses sina Datan at Abiram. Sumunod sa kanya ang matatanda sa Israel. 26 Sinabi niya sa kapulungan, “lumayo kayo sa tolda ng mga suwail na ito! Huwag ninyong sasalingin man lang ang anumang ari-arian nila pagkat pati kayo’y malilipol dahil sa kanilang mga kasalanan.” 27 Lumayo nga sila sa tolda ni Core, Datan at Abiram. Sina Datan at Abiram ay nakatayo sa pintuan ng kani-kaniyang tolda, kasama ng kani-kanilang asawa’t mga anak.
Ang Panginoong Diyos ay inutusan si Moises kasama ang mga matatanda sa Israel. Sinabihan niya ang kapulungan na lumayo o humiwalay sa mga suwail na sina Core, Datan, at Abiram. Ang terminong SUWAIL sa NPV ay isinalin na MASASAMANG TAO (DS) o UBOD NG SASAMA (MB).
Kaya ang Diyos ang may utos ng pagtitiwalag at hindi ang tao. Kapag may itinitiwalag sa Iglesia ay maling isipin na tao lang ang nagtitiwalag. Ginagamit ng Diyos ang Pamamahala na inilagay Niya sa Iglesia upang ito ay isagawa. Ganiyan ang ginawa Niya noong una, ginamit ng Diyos ang taong si Moises para sabihin ang Kaniyang pasiya na humiwalay ang Kaniyang bayan sa mga suwail o masasamang tao, kaya ganito din ang ginagawa Niya ngayon sa Iglesia.
Kung ang lider noon ng bayang Israel ay si MOISES, ngayon naman ay si Kapatid na EDUARDO V. MANALO. Kung may mga kasamang MATATANDA si Moises, mayroon ding kasamang matatanda si Ka Eduardo na ang tawag ay SANGGUNIAN. Subalit tandan natin na hindi ang mga matatanda ang nagsalita sa kapulungan kungdi si Moises. Sa panahon naman natin, si Kapatid na Eduardo ang nagsalita sa pamamagitan ng circular letter o sulat niya sa lahat ng mga Iglesia Ni Cristo na itinitiwalag ang mga masasamang tao sa Iglesia. Iniutos din niya sa atin na humiwalay sa mga suwail batay sa utos ng Diyos na nakasulat sa Biblia:
9 Hindi pinananahanan ng Diyos ang sinumang lumalabis sa halip na mananatili sa turo ni Cristo. Sinumang nanatili sa turo ay kinaroroonan ng Ama at ng Anak. 10 Huwag ninyong papapasukin o tatanggapin sa inyong bahay ang sinumang lumalapit na hindi ito ang dalang aral. 11 Sinumang magpatuloy sa kanya ay nakikihati sa kanyang masamang gawa (2 Juan 1:9-11 NPV).
Pinarusahan ng Diyos noon ang mga suwail o masasamang tao pagkatapos na sila ay mahiwalay sa kapulungan ng Israel. Bumuka ang lupa at nilamon ng lupa ang sambahayan ni Core at ang kaniyang mga pag-aari (Bilang 16:31-33). Bumaba ang apoy mula sa langit at sinunog ang 250 saserdote na nagsusunog ng kamangyan (talatang 35). Ano naman ang gagawin ng Diyos sa mga natiwalag sa panahon natin?
ANO ANG PARUSA SA MGA NATIWALAG?
Ayon din sa 1 Corinto 5:13, ang mga nasa labas ay may hatol. Ano ang hatol sa mga nasa labas ayon kay Cristo? Ang mga hindi nanatili ay masusunog sa apoy (Juan 15:6). Kailan? Sa Araw ng Paghuhukom ayon sa 2 Pedro 3:7, 10.
Sa mga natiwalag kamakailan, nais ba ninyong sapitin ang ganitong kapalaran? Kung nais ninyong maligtas, magbalikloob kayo sa Diyos. Magpilit kayong pumasok na muli sa loob ng Iglesia para kayo maalis sa kalagayang may hatol. Huwag ninyong dayain ang inyong sarili sa paraang iniisip ninyo na maliligtas din ang nasa labas ng Iglesia. Wala kayong mababasa sa Biblia na kapag nasa labas ay may kaligtasan. Ang kailangan ay makabalik kayo sa loob ng Iglesia at matiyagang manatili hanggang sa wakas upang kayo ay maligtas (Mateo 24:13).
ANO NAMAN ANG KAPALARAN NG MGA NAGTIYAGA NA MANATILI SA IGLESIA NI CRISTO PAGDATING NG ARAW NG PAGHUHUKOM?
“Sa panahong iyon ay tatayo si Miguel, ang dakilang pinuno na tagapag-ingat ng iyong bayan. At magkakaroon ng panahon ng kaguluhan na hindi pa nangyari kailanman mula nang magkaroon ng bansa hanggang sa panahong iyon. Ngunit sa panahong iyon ay maliligtas ang iyong bayan, bawat isa na ang pangalan ay matatagpuang nakasulat sa aklat” (Daniel 12:1 ABAB).
Ang panahon ng kaguluhan ay ang Araw ng Panginoon o Araw ng Paghuhukom (Zefanias 1:14-18; 2 Pedro 3:7, 10). Ang bayan ng Diyos sa mga huling araw na ito o sa panahong malapit na ang wakas o sa “mga wakas ng lupa” ay ang Iglesia Ni Cristo na lumitaw sa Pilipinas sa bisa ng mga hula at sa pagsusugo ng Diyos kay Kapatid na FELIX Y. MANALO (Isaias 62:11-12; 43:5-6; 41:9-10). Kaya ang mga nasa loob ng Iglesia Ni Cristo ang mga maliligtas at hindi ang mga nasa labas o natiwalag.
Sinong nasa bayan ng Diyos ang maliligtas? Sapat na bang nabautismuhan lang sa Iglesia Ni Cristo? Hindi. Ang mga maliligtas na Iglesia Ni Cristo ay ang mga kaanib na ang pangalan nila ay matatagpuang nakasulat sa aklat. Ito ang AKLAT NG BUHAY.
Burahin Ninyo ang pangalan nila sa Inyong Aklat ng Buhay; hindi sana sila masama sa mga matuwid (Awit 69:28, Buhay na Salita).
Itala mong lahat ang kanilang sala, Sa mangaliligtas, huwag silang isama (Awit 69:27 NPV).
Ang mga natiwalag sa Iglesia ay binura o inalis ang kanilang mga pangalan sa aklat ng buhay sa langit kaya hindi sila maliligtas. Ayon sa Biblia ay itatapon sa apoy ang hindi nakasulat sa aklat ng buhay (Apocalipsis 20:15). Ang Diyos mismo ang nag-aalis ng mga pangalan nila sa aklat (Exodus 32:31-33).
SA MGA NASA LOOB NA NG IGLESIA NI CRISTO, NAIS BA NINYONG MANATILING NAKATALA SA AKLAT NG BUHAY?
Ano ang isa sa mga gawaing nilalahukan ng mga masisiglang Iglesia Ni Cristo, na kapag nagpagal sa gawaing ito ay tinitiyak ng Biblia na maliligtas dahil ang kanilang pangalan ay nakasulat sa aklat ng buhay? Basahin natin ang ipinahayag ni Apostol Pablo:
Ipinapakiusap ko rin naman sa iyo, tapat kong kasama, na tulungan mo ang dalawang babaing ito. Sila man ay kasama kong nagpagal sa pagpapalaganap ng Magandang Balita, kasama si Clemente at ang iba pang kamanggagawa ko. Ang pangalan nila’y nakasulat sa aklat ng buhay (Filipos 4:3 BMB).
Ang pagpapagal para sa pagpapalaganap ng ebanghelyo ay hindi isang kalugihan para sa mga tunay na Iglesia Ni Cristo sapagkat tiniyak sa Biblia na ang mga nagpagal sa gawaing ito, kasama ng mga ministro at mga manggagawa sa Iglesia Ni Cristo, ay tiyak na maliligtas dahil sa ang kanilang mga pangalan ay nakasulat sa aklat ng buhay.
Ang mga natiwalag ay tiyak na hindi na sasama sa gawaing ito dahil sa wala naman silang pagkakilala na maliligtas ang mga papasok at mananatili sa Iglesia Ni Cristo hanggang sa wakas. Ang iba nga ay nang-uupat pa at sinasabi na nagsasayang lang tayo ng panahon kapag tayo ay sumasama sa mga gawain. Ang hindi nila alam ay ginagamit sila ng diablo upang hadlangan ang gawaing pagliligtas. Sino ba ang ayaw na ang tao ay maligtas? Di ba ang diablo? Papayag ba tayo, mga kapatid, na mahadlangan ng diablo?
Sa darating na September 26, 2015 ay isasagawa natin ang pambuong mundo na pagpapalaganap ng ebanghelyo na pangungunahan ng ating Tagapamahalang Pangkalahatan, ang Kapatid na EDUARDO V. MANALO. Makikipagkaisa ba kayo sa gawaing ito? Sana, tayong lahat ay tumugon sa panawagan ng Pamamahala na mag-anyaya ng maraming mga tao na makapakinig ng dalisay na aral ng Diyos upang sila ay makasama natin sa tunay na Iglesia at magtamo ng biyayang kaligtasan. (2023)

TOTOO BA ANG PARATANG NA MAS KINIKILALA NG MGA IGLESIA NI CRISTO SI KAPATID NA FELIX Y. MANALO KAYSA SA ATING PANGINOONG JESUCRISTO?

Ang mga tumutuligsa sa Iglesia Ni Cristo ay umimbento ng mga paratang upang mapigilan ang mga tao na makinig sa mga aral ng Diyos at huwag silang maganyak na magpatuloy ng pagsusuri sa mga aral na itinuturo sa mga nagnanais na umanib sa Iglesia Ni Cristo.
Ang isa sa mga ipinaparatang sa amin ay ang ukol sa pagkakilala namin sa karapatan ni Kapatid na Felix Y. Manalo. Sinasampalatayan ng Iglesia Ni Cristo na siya ang katuparan ng hinuhulaang “anghel” na magmumula sa Silangan sa Apocalipsis 7:2-3. Paano nila pinilipit ang katotohanang ito?
Ang “anghel” daw ay mas mataas sa “tao” kaya si Kapatid na Felix Y. Manalo na anghel ay mas mataas daw sa ating Panginoong JesuCristo. Bakit? Dahil sa sinasampalatayanan natin na si Cristo ay “tao” sa Kaniyang likas na kalagayan (dahil Siya mismo ang nagpatotoo nito sa Biblia nang sabihin niya sa Juan 8:40 na “ako’y TAO na nagsasaysay ng katotohanan”) kaya ang wrong conclusion nila ay mas mataas daw ang pagkakilala natin kay Kapatid na Felix Y. Manalo kaysa sa ating Panginoong JesuCristo.
Tandaan natin na ito ay isang paratang lang at walang katotohanan. Bakit ko sinasabi na ito ay isang paratang lamang at walang katotohanan? Una, wala tayong aral o doktrina na mas mataas si Kapatid na Felix Y. Manalo sa ating Panginoong JesuCristo. Ikalawa, hindi nangangahulugan na dahil si Kapatid na Felix Y. Manalo ay “anghel” ay mas mataas na siya sa ating Panginoong Jesucristo.
Kaya lang nila ito ginagawang “issue” laban sa amin ay dahil sa inililigaw nila ang mga tao na hindi alam kung ano ba ang kahulugan ng terminong “anghel.” Bakit ba si Kapatid na Felix Y. Manalo ay kinikilala naming anghel? Ano ba ang ibig sabihin na si Kapatid na Felix Y. Manalo ay isang anghel? Ang ibig sabihin nito siya ay “Sugo” (ng Diyos) sapagkat ang terminong anghel, na galing sa wikang Griyego, ay “sugo” ang kahulugan sa wikang Pilipino. Maging ang mga autoridad ng Iglesia Katolika ay nagpapatunay ukol dito:
“They are called ‘Angels', from a Greek word which means messenger. The word ‘Angel’, therefore, does not express the nature of these spirits, but rather the offices...” (Crock, Clement H., Discourses on the Apostles’ Creed, New York, Joseph F. Wagner, © 1938, p. 72)
Alam kaya ng mga kaibigan nating Katoliko na nagpaparatang sa amin na ang kahulugan ng salitang “anghel” ay “sugo”? Baka naman sadyang inililigaw lang nila ang mga tao? Alam ba nila na ang terminong “anghel” ay hindi tumutukoy sa kalagayan kungdi sa tungkulin? Kaya, si Kapatid na Felix Y. Manalo ay anghel sapagkat ito ang kaniyang tungkulin: siya ay “sugo” ng Diyos.
PAANO RAW MAGIGING ‘ANGHEL” ANG ISANG TAONG KATULAD NI KAPATID NA FELIX Y. MANALO?
Bakit ito ang kanilang itinatanong? Dahil sa kanilang maling akala na ang tao ay hindi maaaring maging anghel. Ano ang katunayang mali ang paniniwalang ang tao ay hindi maaaring tawaging “anghel”? Sa Biblia ba ay may mga tao na tinawag na anghel?
MGA TALATA SA BIBLIA NA ANG TERMINONG ANGHEL AY TUMUTUKOY SA MGA TAO
Sa Santiago 2:25, ang terminong Griyego na “tous angelous” ay isinalin na “mga sugo” at ito ay tumutukoy sa mga tao na isinugo ni Josue kay Rahab.
Sa Lucas 7:24, ang terminong Griyego na “tōn angelōn” ay isinalin na “mga sugo” at ito ay tumutukoy sa mga tao na isinugo ni Juan.
Sa Lucas 9:52, ang terminong Griyego na “angelous” ay isinalin na “mga sugo” at ito ay tumutukoy sa mga tao na isinugo ng ating Panginoong JesuCristo sa unahan ng Kaniyang mukha at nagsipasok sa isang nayon ng mga Samaritano.
Kaya isang malaking pagkakamali na akalain na ang tao ay hindi maaaring tawaging anghel.
Maging sa Malakias 2:7 ng Douay-Rheims Version (official Catholic version), ang saserdote ay tinawag na “the angel of the Lord of hosts.” Ipinaliwanag din ng mga awtoridad Katoliko sa footnote ang kahulugan ng terminong “angel” sa talatang ito ay:
“2,7: The angel: the minister and messenger…”.
Ang ministro ba ay tao? Oo. Kung gayon, hindi maling tawagin na si Kapatid na Felix Y. Manalo ay anghel sapagkat siya ay isang tao at isang ministro. Lahat ba naman ng tao ay maaaring tawaging anghel? Hindi. Sinong tao ang maaaring tawaging anghel? Ang tao na isinugo ng Diyos.
Sa Mateo 11:7-10 (Douay-Rheims Version), si Juan Bautista ay tinawag na “angel”.
7 And when they went their way, Jesus began to say to the multitudes concerning John: What went you out into the desert to see? a reed shaken with the wind?
8 But what went you out to see? a man clothed in soft garments? Behold they that are clothed in soft garments, are in the houses of kings.
9 But what went you out to see? a prophet? yea I tell you, and more than a prophet.
10 For this is he of whom it is written: Behold I send my angel before thy face, who shall prepare thy way before thee.
Tandaan nating mabuti na si Juan Bautista ay isang tao. Ayon sa Juan 1:6 (BSP) ay ganito ang sinasabi ukol sa kaniya: “May taong sugo ang Diyos – Juan ang kaniyang pangalan.”
Kaya ang Biblia ay nagtuturo ukol sa mga tao na tinawag na anghel. Isang malaking kamangmangan sa panig ng mga tumutuligsa sa Iglesia Ni Cristo ang sinasabi nilang hindi maaaring tawaging anghel ang isang tao na katulad ni Kapatid na Felix Y. Manalo. Subalit, bagamat itinuturo naming anghel si Kapatid na Felix Y. Manalo ay wala kaming itinuturo na mas mataas siya sa ating Panginong JesuCristo.
Gaano kataas ang pagkakilala namin sa ating Panginoong JesuCristo? Kinikilala namin na wala ng iba pang nilalang ang Diyos na mas mataas sa ating Panginoong JesuCristo. Sino ba ang nagtaas sa Kaniya sa ibabaw ng lahat ng mga nilalang? Ganito ang sinasabi sa Biblia:
Kaya naman, siya’y itinampok ng Diyos at binigyan ng pangalang higit sa lahat ng pangalan, Anupat ang lahat ng nilalang na nasa langit, nasa lupa, at nasa ilalim ng lupa ay maninikluhod at sasamba sa kanya. At ipahahayag ng lahat na si Jesu-Cristo ang Panginoon, sa ikararangal ng Diyos Ama (Filipos 2:9-11 MB).
Ayon sa Biblia, itinampok o itinaas siya ng Diyos. Lahat ng nilalang ng Diyos ay dapat sambahin ang ating Panginoong JesuCristo. Kaya, lahat ng Iglesia Ni Cristo ay sumasamba sa ating Panginoong JesuCristo, kasama naming sumasamba kay Cristo si Kapatid na Felix Y. Manalo noong siya ay nabubuhay pa. Kaya paano nila ngayon pararatangan ang Iglesia Ni Cristo na mas mataas ang pagkakilala namin kay Kapatid na Felix Y. Manalo? Siya mismo ang nagturo sa amin na dapat naming sambahin ang ating Panginoong JesuCristo.
Ngunit dapat ninyong tandaan na kaya namin sinasamba ang ating Panginoong JesuCristo ay sapagkat utos ito ng Diyos, at ang pagsamba sa kaniya ay sa ikararangal o ikaluluwalhati ng Diyos Ama.
PAREHO BA ANG KAPANGYARIHAN NG AMA AT NG ANAK?
Magkapantay ba sa kapangyarihan ang Ama at ang Anak? Hindi. Mas mataas ang kapangyarihan ng Ama kaysa sa Kaniyang Anak. Ano ang katunayan mula sa Biblia na mas mataas ang Ama na siyang tunay na Diyos kaysa sa Kaniyang Anak? Ganito ang pagtuturo ni Apostol Pablo:
Ganito ang sinasabi ng Kasulatan: “Ang lahat ng bagay ay lubusang pinasuko sa kanya ng Diyos.” (Ngunit sa salitang “lahat ng bagay,” maliwanag na hindi kasama rito ang Diyos na siyang naglagay ng lahat ng bagay sa ilalim ng kapangyarihan ni Cristo.) At kapag ang lahat ay nasa ilalim na ng kapangyarihan ni Cristo, ang Anak naman ang paiilalim sa kapangyarihan ng Diyos na naglagay ng lahat ng bagay sa ilalim ng kapangyarihan niya. Sa gayon, lubusang maghahari ang Diyos sa kalahat-lahatan (1 Corinto 15:27-29 MB).
Maliwanag ang sinasabi ng Biblia: “ang Anak naman ang paiilalim sa kapangyarihan ng Diyos.” Sino ba ang Anak? Di ba ang ating Panginoong JesuCristo? Kanino siya paiilalim? Sa kapangyarihan ng Diyos. Iba ang Diyos na naglagay ng lahat ng bagay sa ilalim ng kapangyarihan ni Cristo kaysa kay Cristo na paiilalim sa kapangyarihan ng Diyos!
Kaya nagkakamali ang mga tagapagturong Katoliko sa kanilang pagtuturo na ang ating Panginoong JesuCristo ay tunay na Diyos. Kailanman ay hindi itinuro ng ating Panginoong JesuCristo na siya ay tunay na Diyos. Ipinakilala niya sa atin nang siya ay manalangin sa Ama na nasa langit na Siya lamang ang “kaisa-isang tunay na Diyos” (Juan 17:3 SNB).
Sinasamba ng mga tunay na Iglesia Ni Cristo ang tunay na Diyos at ang ating Panginoong Jesucristo. Kasama sa mga sumamba sa ating Panginoong JesuCristo si Kapatid na Felix Y. Manalo kaya hindi siya mas mataas kay Cristo.
Kaya, sa mga kaibigan naming mga Katoliko na nakabasa ng paliwanag na ito, sana ay huwag kayong mahadlangan sa inyong pagsusuri sa mga aral na sinasampalatayan ng Iglesia Ni Cristo. Magpatuloy kayo sa pakikinig upang malaman ninyo ang tunay na katotohanan ukol sa Diyos at sa ating Panginoong JesuCristo, maging ang ukol sa pagka-sugo ni Kapatid na Felix Y. Manalo. (2023)

SI CRISTO BA AY DIYOS DAHIL SA SINASABI SA FILIPOS 2:6 NA SIYA AY NASA ANYONG DIYOS?

Ang mga nagtataguyod ng aral na si Cristo’y Diyos ay ginagamit ang talatang ito para patunayan na tama at may batayan ang kanilang paniniwala tungkol sa likas na kalagayan ni Cristo. Patutunayan natin sa ating gagawing pagsusuri na mali ang kanilang pagkaunawa sa talatang ito. Paano ba isinalin sa Dating Salin ng Biblia ang Filipos 2:6 at sa salin ng Biblia na tinatawag na Magandang Balita?
“Na siya, bagama’t nasa anyong Dios.” (DS)
“Na bagamat siya’y Diyos,” (MB)
Tamang salin ba ang pagkakasalin ng talatang ito sa Magandang Balita? Hindi, maling salin ito, ang tamang salin ay ang nasa Dating Salin ng Biblia. Tandaan nating mabuti na ang Bagong Tipan ay nasulat sa wikang Griyego. Ano ba ang pagkakasulat ng talatang ito sa Greek New Testament?
os en morphe theou uparchon ouch arpagmon egesato to einai isa theo)
Paano ba isinalin ng mga karamihang translators sa English ang talatang ito?
Sa NKJV at iba pa ay “who, being in the form of God, did not consider it robbery to be equal with God,”
Ano ba ang katumbas sa Griyego ng terminong “form” na sa Filipino ay “anyo”? Sa Greek ay MORPHE. Tatlong beses lang ginamit ang terminong ‘yan sa Greek New Testament na pawang ginamit upang tumukoy sa ating Panginoong JesuCristo, Mark 16:12, Filipos 2:6 at 7.
Ano ang pakahulugang ibinigay ng mga Greek lexicographers sa terminong MORPHE?
Ayon kay Vine, “denotes the special or characteristic form or feature of a person or thing” (Vine’s, p. 251)
Ayon naman kay Persbacher ay “form”
At ayon kay Strong’s ay “shape, fig. nature – form
Ano ang kahulugan ayon sa ilang mga Greek grammarians ng terminong MORPHE THEOU?
Ayon pa rin kay Vine ay “Thus in the passage before us morphē Theou is the Divine nature actually and inseparably subsisting in the Person of Christ” (Vine’s, p. 251). Filipino translation: Kaya sa talatang nakalatag sa atin ang morphē Theou ay nangangahulugang ang banal na kalikasan na aktuwal na nananatili at hindi maihihiwalay sa katauhan ni Cristo.”
Kaya sa saling international English Bible ay ganito ang pagkakasalin:
“Though Christ was divine by nature,” Filipino translation: “Bagama’t si Cristo ay banal sa kalikasan.”
Kaya, sa kanilang pagkakaunawa, ang pagiging banal ni Cristo sa kalikasan ay ang pagiging anyong Diyos niya.
Sinasang-ayunan ba ng mga Greek grammarians na ang terminong MORPHE ay katangian ang kahulugan?
Ayon kay Abbott-Smith, ay ganito ang ibinigay niyang pakahulugan sa kaniyang aklat na A Manual Greek Lexicon of the New Testament, p. 296:
MORPHE, form, shape, appearance; in philos. lang. the specific character.
Filipino: anyo, hugis, kaanyuan, sa wikang ginagamit sa pilosopia, isang tiyak na katangian.
Ayon sa Greek dictionary, ang isa sa kahulugan ng terminong MORPHE ay “form” o “shape” Ang tunay na Diyos ba ay may physical na ANYO o PORMANG PISIKAL? Wala, dahil sa ang tunay na Diyos ay WALANG PISIKAL NA ANYO o WALANG PORMANG PISIKAL at iyan ang pinatutunayan ni Moises sa Deut. 4:12:
“At ang Panginoo’y nagsalita sa inyo mula sa gitna ng apoy; inyong narinig ang tinig ng mga salita, nguni’t wala kayong anyong nakita; ang inyo lamang narinig ay isang tinig.”
Bakit ang tunay na Diyos ay walang anyong pisikal o PORMANG PISIKAL? Sapagkat ang tunay na Diyos ay Espiritu ayon kay Cristo sa Juan 4:24: “Ang Dios ay Espiritu: at ang mga sa kaniya'y nagsisisamba ay kinakailangang magsisamba sa espiritu at sa katotohanan.” – na ang kahulugan nito ay “walang laman at mga buto” ayon sa Lukas 24:39.
Ano pa ang pagkaunawa ng mga nagsuri ng terminong MORPHE? Ang MORPHE ay kasingkahulugan ng LARAWAN ayon kay James Dunn sa kaniyang aklat na Christology in the Making: An Inquiry into the Origins of the Doctrine of the Incarnation, sa page 115 ay ganito ang sinasabi niya:
“… it has long been recognized that morphē (form) and eikōn (image) are near synonyms and that in Hebrew thought the visible form of God is his glory.” “…
Filipino translation:
“ … malaon nang kinikilala ang morphe (anyo) at ang eikon (larawan) ay magkasingkahulugan at sa kaisipang Hebreo ang nakikitang anyo ng Diyos ay ang Kaniyang kaluwalhatian.”
Sino pa ang nagpapatotoo na ang terminong MORPHE ay kasingkahulugan ng terminong EIKON? Ayon sa aklat na Vine’s Complete Expository Dictionary of Old and New Testament Words: sa page 319 ay ganito ang sinasabi:
“IMAGE 1. eikōn (1504), As to synonymous words, morphē is ‘the form, as indicative of the inner being.’”
Filipino translation:
LARAWAN 1. eikōn (1504), Sa mga salitang kasingkahulugan nito, morphē ang ay “ang anyo, na tumutukoy sa kalagayang panloob.”
Pinatotohanan ba maging ng mga bible commentators na ang terminong MORPHE ay kasingkahulugan ng terminong EIKON? Ayon sa aklat na The Layman’s Bible Commentary, by Archibald M. Hunter, sa pages 94-95 ay ganito ang sinasabi:
“The ‘form’ is the ‘likeness’ of God (Gen. 1:26). It is a synonym for another Greek word meaning ‘image’ or ‘likeness,’ and both represent the Hebrew used in Genesis.
Filipino translation:
Ang anyo ay ang wangis ng Diyos (Gen. 1:26). Ito ay kasingkahulugan ng isa pang terminong Griyego na ang kahulugan ay “larawan” o “wangis” at kapuwa kumakatawan sa wikang Hebreo na ginamit sa Genesis.
May binabanggit ba sa Biblia na si Cristo ay “image of God” o larawan ng Diyos, kasingkahulugan na Siya ay nasa anyong Diyos? Mayroon, sa 2 Corinto 4:4 ay ganito ang sinasabi ni Apostol Pablo.
4 Na binulag ng dios ng sanglibutang ito ang mga pagiisip ng mga hindi nagsisisampalataya, upang sa kanila'y huwag sumilang ang kaliwanagan ng evangelio ng kaluwalhatian ni Cristo, na siyang larawan ng Dios.
Hindi ba ito ang katunayan na si Cristo ay tunay na Diyos dahil sa Siya ay larawan ng Diyos? Hindi ito magagamit na batayan dahil sa ang tao ay nilalang ayon sa larawan ng Diyos (Genesis 1:26-27).
26 At sinabi ng Dios, Lalangin natin ang tao sa ating larawan, ayon sa ating wangis: at magkaroon sila ng kapangyarihan sa mga isda sa dagat, at sa mga ibon sa himpapawid, at sa mga hayop, at sa buong lupa, at sa bawa't umuusad, na nagsisiusad sa ibabaw ng lupa. 27 At nilalang ng Dios ang tao ayon sa kaniyang sariling larawan, ayon sa larawan ng Dios siya nilalang; nilalang niya sila na lalake at babae.
Kapag tinanggap natin ang kanilang paliwanag na si Cristo ay tunay na Diyos dahil sa Siya ay larawan ng Diyos, lalabas na LAHAT ng tao ay tunay na Diyos na rin dahil sa lahat ng tao ay nilalang sa larawan ng Diyos!
Sa ano ba kalarawan ng tao ang Diyos? Di ba ang sabi ng Biblia ay walang pisikal na anyo ang Diyos sapagkat Siya ay isang Espiritu? Tama, ang Diyos ay walang pisikal na anyo pero may katangian ang Diyos na sa sentidong ito Niya kalarawan ang tao at ang ating Panginoong JesuCristo. Sa I Pedro 1:15-16, ay ganito ang sinasabi:
15 Nguni't yamang banal ang sa inyo'y tumawag, ay mangagpakabanal naman kayo sa lahat ng paraan ng pamumuhay; 16Sapagka't nasusulat, Kayo'y mangagpakabanal; sapagka't ako'y banal.
Sa pagiging banal kalarawan ng Diyos ang tao at ang ating Panginoong Jesucristo. Kaya maging noong una pa man, ano ang nais ng Diyos na maging katangian ng tao na Kaniyang nilalang? Maging mga banal at walang dungis sa pag-ibig ayon sa Efeso 1:4.
4 Ayon sa pagkapili niya sa atin sa kaniya bago itinatag ang sanglibutan, upang tayo'y maging mga banal at mga walang dungis sa harapan niya sa pagibig:
Namalagi ba ang mga taong nilalang ng Diyos sa ganitong katangian – banal at umiibig? Hindi, ayon sa Biblia ay lahat ay nangagkasala nga at hindi nangakaabot sa kaluwalhatian ng Dios (Rom. 3:23):
23 Sapagka't ang lahat ay nangagkasala nga, at hindi nangakaabot sa kaluwalhatian ng Dios;
Sino lamang ang nakaabot ng katangiang ito ng Dios – sa pagiging banal? Ang ating Panginoong JesuCristo sapagka’t hindi Siya nagkasala (I Ped. 2:21-22).
21Sapagka't sa ganitong bagay kayo'y tinawag: sapagka't si Cristo man ay nagbata dahil sa inyo, na kayo'y iniwanan ng halimbawa, upang kayo'y mangagsisunod sa mga hakbang niya: 22Na siya'y hindi nagkasala, o kinasumpungan man ng daya ang kaniyang bibig:
Bukod dito, si Cristo ay nagpakita ng katangiang tunay na umiibig sa Diyos. Paano ba ang tunay na pag-ibig sa Diyos ayon sa Biblia? Sapagkat ang tunay na umiibig sa Diyos ay yaong tumutupad ng kanyang mga utos ayon sa I Juan 5:3 MB:
3 sapagkat ang tunay na umiibig sa Diyos ay yaong tumutupad ng kanyang mga utos. At hindi naman mahirap sundin ang kanyang mga utos,
Ano ang ginawa ni Cristo na nagpapatunay na Siya nga ay tunay na umiibig sa Diyos kaya tinaglay Niya ang katangian na banal at umiibig? Si Cristo ay nagpakumbaba at nagmasunurin sa Diyos hanggang sa kamatayan ayon sa Filip. 2:8:
8 At palibhasa'y nasumpungan sa anyong tao, siya'y nagpakababa sa kaniyang sarili, na nagmasunurin hanggang sa kamatayan, oo, sa kamatayan sa krus.
Ano ang ginawa kay Cristo dahil sa Siya ay nagpakumbaba at nagmasunurin sa Diyos hanggang sa kamatayan? Si Cristo ay pinadakila ng Diyos ayon sa Filip. 2:9-11:
9 Kaya siya naman ay pinakadakila ng Dios, at siya'y binigyan ng pangalang lalo sa lahat ng pangalan; 10 Upang sa pangalan ni Jesus ay iluhod ang lahat ng tuhod, ng nangasa langit, at ng nangasa ibabaw ng lupa, at ng nangasa ilalim ng lupa, 11 At upang ipahayag ng lahat ng mga dila na si Jesucristo ay Panginoon, sa ikaluluwalhati ng Dios Ama.
Tandaan nating mabuti na si Cristo ay pinadakila ng Diyos. Iba ang nagpadakila kaysa pinadakila. Tandaan din natin na binanggit sa aklat ni James Dunn na ayon sa kaisipang Hebreo, ang nakikitang anyo ng Diyos ay ang Kaniyang kaluwalhatian. Sa Biblia ba ay binabanggit kung sino ang sinag ng kaluwalhatian ng Diyos?
Ang Anak o si Cristo ang Siyang sinag ng kaniyang kaluwalhatian, at tunay na larawan ng kaniyang pagka-Diyos ayon sa Hebreo 1:2-3.
2 Ay nagsalita sa atin sa mga huling araw na ito sa pamamagitan, ng kaniyang Anak, na siyang itinalaga na tagapagmana ng lahat ng mga bagay, na sa pamamagitan naman niya'y ginawa ang sanglibutan; 3 Palibhasa'y siyang sinag ng kaniyang kaluwalhatian, at tunay na larawan ng kaniyang pagka-Dios, at umaalalay ng lahat ng mga bagay sa pamamagitan ng salita ng kaniyang kapangyarihan, nang kaniyang magawa na ang paglilinis ng mga kasalanan, may lumuklok sa kanan ng Karangalan sa kaitaasan;
Si Cristo ay ang Sinag at Larawan ng Diyos kaya sinasabi sa Filip. 2:6 na Siya ay nasa anyong Diyos. Hindi ba ito ay katunayan na si Cristo ay tunay na Diyos dahil sa Siya ay ang maningning na sinag ng kaluwalhatian ng Diyos? Hindi pa rin mapagbabatayan na si Cristo ay tunay na Diyos kahit na Siya ay sinag ng kaluwalhatian ng Diyos sapagkat ang lalake man ay hindi lamang larawan kundi kaluwalhatian din ng Diyos ayon sa Biblia. Ganito ang pahayag sa 1 Corinto11:7 (DS).
7 Sapagka't katotohanang ang lalake ay hindi dapat maglambong sa kaniyang ulo, palibhasa'y larawan siya at kaluwalhatian ng Dios: nguni't ang babae ay siyang kaluwalhatian ng lalake.
Ang lalake ba ay Diyos din dahil sa siya ay larawan at kaluwalhatian ng Diyos?
Ano pa ang dahilan kaya si Cristo ay nasa anyong Diyos? Sapagkat Siya ay pinahiran o pinagkalooban ng kapangyarihan ayon sa Gawa 10:38 (DS at MB)
38 Sa makatuwid baga'y si Jesus na taga Nazaret, kung paanong siya'y pinahiran ng Dios ng Espiritu Santo at ng kapangyarihan: na naglilibot na gumagawa ng mabuti, at nagpapagaling sa lahat ng mga pinahihirapan ng diablo; sapagka't sumasa kaniya ang Dios.
38 Ang sinasabi ko'y tungkol kay Jesus na taga-Nazaret. Ipinagkaloob sa kanya ng Diyos ang Espiritu Santo at ang kapangyarihan bilang katunayan na siya nga ang Hinirang. Sapagkat sumasakanya ang Diyos, saanman siya pumaroon ay gumagawa siya ng kabutihan at nagpapagaling sa lahat ng pinahihirapan ng diyablo.
Nangangahulugan ba na si Cristo ay tunay na Diyos na dahil sa pinagkalooban ng kapangyarihan? Hindi, dahil sa ang Anak ay paiilalim sa kapangyarihan ng Diyos ayon sa I Cor. 15:27-28 MB.
27 Ganito ang sinasabi ng Kasulatan: "Ang lahat ng bagay ay lubusang pinasuko sa kanya ng Diyos." (Ngunit sa salitang "lahat ng bagay," maliwanag na hindi kasama rito ang Diyos na siyang naglagay ng lahat ng bagay sa ilalim ng kapangyarihan ni Cristo.) 28 At kapag ang lahat ay nasa ilalim na ng kapangyarihan ni Cristo, ang Anak naman ang paiilalim sa kapangyarihan ng Diyos na naglagay ng lahat ng bagay sa ilalim ng kapangyarihan niya. Sa gayon, lubusang maghahari ang Diyos sa kalahat-lahatan.
Kaya hindi sila magkapantay ng Ama kung ang pag-uusapan ay kapangyarihang taglay ng bawat isa. Inamin ba ni Cristo na hindi nga Niya kapantay ang Diyos? Oo, ang sabi Niya ay “Ang Ama ay higit na dakila kaysa akin” (Juan 14:28 NPV).
28 "Narinig ninyong sinabi ko, 'Aalis ako ngunit babalikan ko kayo.' Kung iniibig ninyo ako, magagalak kayo sa pagpunta ko sa Ama, pagkat ang Ama ay higit na dakila kaysa akin.
Ano ang samang ibubunga kapag ginamit na batayan sa pagtuturong si Cristo ay Diyos ang saling MB ng Filip. 2:6? Ayon din sa saling ito, “Na bagamat siya’y Diyos, hindi nagpilit na manatiling kapantay ng Diyos,” si Cristo daw ay kapantay ng Diyos. Kapag ginamit ang saling ito ay magkakaroon ng kontradiksyon ang talatang ito sa iba pang mga talata ng Biblia!
Anong mga aral ng Biblia ang sasalungatin ng saling ito ng Filip. 2:6 na kapantay ni Cristo ang Diyos? Ang aral na nakasulat sa Isaias 46:5, 9 NPV na ang tunay na Diyos ay walang kapantay at walang katulad. Ganito ang sinasabi ng Kasulatan:
5 "Kanino ninyo ako itutulad o kanino ninyo ipapantay? Kanino ninyo ako ihahambing? 9Alalahanin ninyo ang mga dating bagay, mga bagay noong unang panahon. Ako ang Dios, at wala nang iba pa. Ako ang Dios at walang ibang tulad ko.
Paano isinalin ng mga translators ng Magandang Balita ang Isaias 46:5?
Sinabi ni Yahweh, "Saan ninyo ako itutulad? Mayroon bang makapapantay sa akin?
Kaya ang tunay na Diyos ay walang kapantay sa pagiging tunay na Diyos! Kaya maling salin ang nasa MB na si Cristo ay kapantay ng Diyos. Kaya alin ang tamang salin ng Filipos 2:6? Karamihan ng mga salin sa English at Filipino ay “in the form of God” o “nasa anyong Diyos.”
6 Na siya, bagama't nasa anyong Dios, ay hindi niya inaring isang bagay na nararapat panangnan ang pagkapantay niya sa Dios.
Dahil sa si Cristo lamang ang nakapantay sa Diyos sa pagiging banal at umiibig kaya Siya ay nasa anyong Diyos, papaano muling mababalik ang tao sa katangiang ito na hindi niya naabot dahil sa nagkasala ang lahat?
Ayon sa Biblia, kailangan na ang tao ay maging katulad ng larawan ni Cristo ayon sa Roma 8:29.
29 Sapagka't yaong mga nang una pa'y kaniyang nakilala, ay itinalaga naman niya na maging katulad ng larawan ng kaniyang Anak, upang siya ang maging panganay sa maraming magkakapatid:
Paano magiging kalarawan ni Cristo ang tao sa kabanalan? Paano ba magiging banal ang taong nagkasala? Para ang tao ay maging banal, kailangan na siya ay matubos ng dugo ni Cristo ayon sa Efeso 1:4, 7 (DS):
Ayon sa pagkapili niya sa atin sa kaniya bago itinatag ang sanglibutan, upang tayo'y maging mga banal at mga walang dungis sa harapan niya sa pagibig:
Na sa kaniya'y mayroon tayo ng ating katubusan sa pamamagitan ng kaniyang dugo, na kapatawaran ng ating mga kasalanan, ayon sa mga kayamanan ng kaniyang biyaya,
Sino ba ang mga taong tinubos ng dugo ni Cristo na sila ang kalarawan ni Cristo sa kabanalan dahil sa pinatawad na ang mga kasalanan? Ang mga nasa Iglesia Ni Cristo ayon sa Gawa 20:28 (Salin sa Pilipino ng LAMSA Translation):
Ingatan ninyo kung gayon ang inyong mga sarili at ang buong kawan, na dahil dito ay ginawa kayo ng Espiritu Santo na mga tagapag-alaga, upang pakanin ang Iglesia Ni Cristo na binili niya ng kaniyang dugo.
Paano mananatiling kalarawan ni Cristo sa kabanalan ang mga taong nag-Iglesia ni Cristo? Dapat makita ang bagong pagkatao na nilikhang kalarawan ng Diyos, kalarawan ng kanyang katwiran at kabanalan ayon sa Efeso 4:21-24 MB:
21 kung talagang pinakinggan ninyo ang aral niya at naturuan kayo ng katotohanang na kay Jesus. 22 Iwan na ninyo ang dating pamumuhay. Hubarin na ninyo ang inyong dating pagkatao, na napapahamak dahil sa masasamang pita. 23 Magbago na kayo ng diwa at pag-iisip; 24 at ang dapat makita sa inyo'y ang bagong pagkatao na nilikhang kalarawan ng Diyos, kalarawan ng kanyang katuwiran at kabanalan.
Dahil dito, ano ang tinamong karapatan ng mga taong nilinis ng dugo ni Cristo at ano ang biyayang nakalaan para sa kanila? Ang karapatang maglingkod at ang mana na walang hanggan ayon sa Hebreo 9:14-15 (NPV):
14 Gaano pa kaya ang dugo ni Cristo, na sa pamamagitan ng walang hanggang Espiritu ay inihandog sa Dios ang kanyang sarili na walang kapintasan, upang malinis ang ating budhi mula sa gawaing naghahatid sa kamatayan. Sa gayon, makapaglilingkod tayo sa buhay na Dios! 15 Dahil dito, si Cristo ang tagapamagitan sa isang bagong tipan upang ang mga tinawag ay tumanggap ng ipinangakong mana na walang hanggan ngayong namatay siya bilang pantubos sa mga taong nagkasala sa ilalim ng unang tipan.
Sino ba ang mga tinawag na tatanggap ng ipinangakong mana na walang hanggan? Ang mga tinawag upang maging isang katawan ayon sa Col. 3:15, MB:
15 At paghariin ninyo sa inyong puso ang kapayapaang kaloob ni Cristo, sapagkat ito ang dahilan kaya kayo tinawag upang maging bahagi ng isang katawan. Magpasalamat kayong lagi.
Alin ang katawan na doon naroroon ang mga tinawag ng Diyos? Ang Iglesia ang katawan ni Cristo ayon sa Col. 1:18, MB:
18 Siya ang ulo ng iglesya na kanyang katawan . . .
Ano ang pangalan ng Iglesia na katawan ni Cristo? Ang Iglesia Ni Cristo ayon sa Roma 16:16, NPV:
16Magbatian kayo ng banal na halik. Lahat ng iglesya ni Cristo ay bumabati sa inyo.
Para ang tao ay maging kalarawan ng Diyos, dapat ay nasa loob siya ng Iglesia Ni Cristo, patuloy siya na nagbabagong-buhay at sumusunod sa utos ng Diyos. Sana, ang mga nakabasa ng artikulong ito ay tumugon sa tawag ng Diyos, na sila man ay makapag-Iglesia Ni Cristo para tamuhin nila ang walang hanggang pangako ng Diyos. (2023)

SI CRISTO BA AY DIYOS DAHIL SA SINABI NIYA NA “AKO AT ANG AMA AY IISA” SA JUAN 10:30?

May mga naniniwala na ang ating Panginoong JesuCristo ay Diyos dahil sa binanggit niya sa Juan 10:30 na “Ako at ang Ama ay iisa.” Bagamat hindi niya sinabi sa talatang ito na siya ay Diyos subalit ang naging pagkaunawa ng iba ay Diyos si Cristo sapagkat kung ang Ama ay Diyos at iisa lang sila ni Cristo, parang lumalabas na si Cristo ay Diyos din. Dahil sa hindi namin tinatanggap na si Cristo ay Diyos sa talatang ito, nagiging “stumbling block” ito sa mga inaaanyayahan namin na umanib sa Iglesia Ni Cristo.
Ang isa sa mga may ganitong paniniwala ay si Matet Bergancia, isa sa mga bumabasa ng aking post dito sa Facebook at ang nag-share sa kaniya ng ginawa kong artikulo ay si Kapatid na Joemil Marcellana Mujar. Nasa ibaba ang kaniyang comments pagkatapos niyang mabasa ang pagtalakay ko sa pagkakakilanlan sa tunay na Diyos. Ang sabi niya ay:
Joe Ventilacion, Napakaganda ng pagkakasulat nyo ng paliwanag. Subalit bako bako at di buo. Walang sinabing tuluyan ang biblia tungkol sa trinity. Pero ito ay napapalaman sa maraming nasusulat sa aklat. Sabi nga mismo ni Jesuskristo, marami ang hindi makakaintindi ng sinasabi nya. Kung di ako nagbabasa ng biblia ay napakadali kong maniwala kasi biblical lahat ng nasusulat dito. Pero sabihin mo nga sa akin, pano mo ipapaliwanag itong mga nasusulat sa isaiah 9:6. John 8:24, 8:41-42, 8:54, 8:58, and 10:30? Kung sinasabi mong si Jesus ay walang katauhang Diyos, sinasabi mo na si Jesus ay sinungaling? Napakalaking kalapastanganan. Aralin natin ng buo ang salita ng Diyos wag piliin ang gusto lang maintindihan dahil kung ganyan tayo wala tayong tamang patutunguhan.
Pag-aralan nating mabuti ang talatang ito para maintindihan natin kung ano ba talaga ang tunay na kahulugan ng sinabi ni Cristo na “Ako at ang Ama ay iisa” upang ang mga nag-aakalang si Cristo ay Diyos batay sa talatang ito ay ganap na maliwanagan na hindi ito isang katunayan na ang Ama at si Cristo ay iisa lamang na Diyos. Sangguniin natin ang pagkakasulat nito sa wikang Griyego na siyang orihinal na wika nang isinulat ang Bagong Tipan sa lalong ikalalawak ng ating pagsusuri.
ANG KATUMBAS NG TERMINONG “IISA” SA WIKANG GRIYEGO
Ano ba ang katumbas ng terminong IISA sa wikang Griyego ng Bagong Tipan? Tatlong termino ang katumbas nito: EIS (masculine), MIA (feminine) EN (neuter).
Sa Biblia ay makikita sa Efeso 4:5 ang tatlong terminong ito na ginamit sa isang pagkakaton: eis kurios (one Lord), mia pistis (one faith), en baptisma (one baptism).
Ganito ang pagkakasalin sa Tagalog, sa English at maging sa Spanish:5 Isang Panginoon, isang pananampalataya, isang bautismo (DS).5 one Lord, one faith, one baptism; (New King James Version)5 Hay un solo Señor, una sola fe, un solo bautismo; (DHH)
Sa wikang Pilipino at maging sa wikang English ay hindi kaagad makikita ang pagkakaiba sa gender. Sa wikang Espanol ay dalawang uri ng gender ang ginamit: masculine (un solo) at feminine (una sola) subalit kitang-kita ang pagkakaiba sa wikang Griyego dahil sa tatlong genders ang ginamit dito: masculine, feminine, neuter – eis, mia, hen.
Ano ang terminong Griyego na ginamit sa Juan 10:30? Ang neuter form na “en.” Ganito ang nakasulat sa talata:EGO KAI O PATER EN ESMEN.
Bakit ang ginamit sa Juan 10:30 ay neuter form at hindi masculine o kaya ay feminine? Narito ang paliwanag ng mga bible scholars na nagsuri ng terminong ito:
With the aid of the monotheistic formula the Gospel of John develops the idea of the unity of God and Christ (John 10:30; 17:11,21,22,23). (from Exegetical Dictionary of the New Testament © 1990 by William B. Eerdmans Publishing Company. All rights reserved.)
Kaya ginamit ang neuter form ay upang ipakita ang PAGKAKAISA ng Diyos at ni Cristo. Bakit hindi ginamit ang masculine form? Dahil kapag ito ang ginamit, lalabas na iisa lang sa kalagayan ang Ama at ang Anak na ito ay mali. Bakit naman hindi sila iisa sa kalagayan? Sapagkat ang Ama ay espiritu (Juan 4:23-24) samantalang ang Anak ay tao na may laman at buto (Juan 8:40; Lukas 24:39).
Bakit hindi ginamit ang feminine form? Sapagkat ang Ama at ang Anak ay parehong kabilang sa masculine gender.
Paano isinalin ang talatang ito sa ibang mga English translations?
My Father and I are united (The Plain English Bible).
Ang aking Ama at ako ay nagkakaisa.
I and my Father are of one accord (Lamsa Translation).
Ako at ang aking Ama ay nagkakaisa.
And I am one with the Father (Contemporary English Version).
At Ako ay kaisa ng Ama.
Kaya ang pagkakagamit ng terminong IISA ay upang ipakita ang pagkakaisa ng Ama at ng Anak. Hindi nito itinuturo na silang dalawa ay iisang Diyos.
Sa anong gawain iisa o nagkakaisa ang Ama at ang Anak? Sa pangangalaga ng mga tupa. Tunghayan natin ang mga naunang pahayag ni Cristo bago pa siya nag-conclusion na “Ako at ang Ama ay iisa”:
27 Dinirinig ng aking mga tupa ang aking tinig, at sila’y aking nakikilala, at sila’y nagsisisunod sa akin;28 At sila’y binibigyan ko ng walang hanggang buhay; at kailan ma’y hindi sila malilipol, at hindi sila aagawin ng sinoman sa aking kamay.29 Ang aking Ama, na sa kanila ay nagbigay sa akin, ay lalong dakila kay sa lahat; at hindi sila maaagaw ninoman sa kamay ng Ama.
Ang Ama at Anak ay nagkakaisa sa gawaing pangangalaga ng mga tupa. Kung paanong hindi maaagaw ninuman sa kamay ng Anak ang mga tupa ay gayundin hindi maaagaw ninuman ang mga tupa sa kamay ng Ama, kaya ang Anak at Ama ay nagkakaisa sa gawaing ito.
Aling talata sa aklat ni Juan na ginamit din ang terminong ISA, na sa Greek New Testament, ito ay ang neuter form na “en”? Sa Juan 17:23 ay ganito ang nakasulat:
23 Ako’y sa kanila, at ikaw ay sa akin, upang sila’y malubos sa pagkakaisa (DS).
23 Ako’y sa kanila at ikaw ay nasa akin, upang sila’y maging ganap na isa (ABAB).
23 Ako’y nasa kanila at ikaw ay nasa akin, upang lubusan silang maging isa (MB).
Sa talatang ito ay nananalangin ang ating Panginoong JesuCristo. Ang panalangin niya ay para sa mga ibinigay sa kaniya ng Ama (Juan 17:9) na ito ang tinawag ng Diyos upang makipag-isa sa kaniya (1 Corinto 1:9 MB). Ang mga tinawag ay nasa isang katawan (Colosas 3:15) na ito ang Iglesia na si Cristo ang ulo (Colosas 1:18). Ang Iglesiang ito ay ang Iglesia Ni Cristo (Roma 16:16 NPV).
Kaya nanalangin si Cristo na ang mga Iglesia Ni Cristo ay maging ganap na isa, lubusan na maging isa, o malubos sa pagkakaisa sa Juan 17:23. Ang terminong ISA sa Griyego na ginamit sa talatang ito ay EN na ito rin ang ginamit sa Juan 10:30.
Ano rin ang pagkaunawa ng mga Bible scholars na sumuri ng talatang ito? Ano ang pagkakagamit ng neuter form na “en” sa talatang ito?Christ himself is in unity with the Father and brings his own into the same fellowship (John 17:23). (from Theological Dictionary of the New Testament, abridged edition, Copyright © 1985 by William B. Eerdmans Publishing Company).
Kaya kahit mga bible scholars ay nagpapatunay na ang terminong EN sa talatang ito ay UNITY o PAGKAKAISA ang tinutukoy. Ito rin ang tinutukoy ng salitang EN na ginamit sa Juan 10:30 upang ipakita ang PAGKAKAISA ng Ama at ng ating Panginoong JesuCristo.
ANG MGA KATUNAYAN SA BIBLIA NA HINDI IISANG DIYOS ANG AMA AT ANG ANAK
Anu-ano ang mga pahayag ng ating Panginoong JesuCristo na nagpapatunay na hindi sila iisa sa kalagayan ng Ama, hindi rin sila iisa sa kapangyarihan at lalong hindi sila iisang Diyos?
Juan 8:16
16 Humatol man ako, tama ang aking hatol, sapagkat hindi lamang ako ang humahatol, kundi ako at ang Amang nagsugo sa akin (MB).
16 At kung ako’y humatol man ang hatol ko’y totoo, sapagkat hindi ako nag-iisa, kundi ako at ang Ama na nagsugo sa akin (ABAB).
16 But even if I do judge, My judgment is true and My decision is right; for I am not alone [in making it], but I and the Father who sent Me [make the same judgment] (AMPLIFIED BIBLE).
Juan 8:29
29 At siya na nagsugo sa akin ay kasama ko, hindi niya ako binayaang nag-iisa; (ABAB).
29 At kasama ko ang nagsugo sa akin; hindi niya ako iniiwan; (MB).29 And He who sent Me is with Me; He has not left Me alone,(NASB).
Juan 14:28
28 Sapagkat ang Ama ay higit na dakila kaysa akin (ABAB).
28 Sapagka’t ang Ama ay lalong dakila kay sa akin (DS).
28 because the Father is greater than me (CEB).
Juan 17:1, 3
Ama . . . na ikaw ay makilala nila na iisang Diyos na tunay, at si Jesu-Cristo na iyong sinugo (ABAB).
Father . . . You are the only true God. If they know you, and Jesus Christ whom you sent, they will live for ever (Worldwide English New Testament).
Kaya napatunayan natin sa maikling pag-aaral na ito na hindi si Cristo ang nag-iisang tunay na Diyos kundi ang Ama. Hindi rin sila iisang Diyos ng Ama. Ang pagkakaisa nila ng Ama ang tinutukoy niya nang sabihin niya na “Ako at ang Ama ay iisa” sa Juan 10:30.Kapag tinanggap natin ang aral na ang Ama lamang ang iisang tunay na Diyos at si Cristo ay sinugo ng Ama, ito ang ikapagtatamo natin ng buhay na walang hanggan. (2023)